إذلال | Humiliation

كلمتين محشورين فى زورى، اقولهم , و رذقى على الله..

المؤيدين بيذلوا المعارضين ان الشرطة نازلة معاهم..

و هما لو كانت الشرطة نزلت معاهم لمرسى كانوا هيسبوه.. صح ؟

هيقولوا مهم مدام ضده يبقى هو صح.. هأو، الشرطة نزلت التحرير عملت مظاهرة بعد تنحى مبارك بيومين بس، كانوا صح ولا كان مبارك صح ؟ هم بيلعبوا صح بيشوفوا الجانب الفائز و ينحازولوا اين كان حلو ولا وحش.. اوساخ، لكن مش معنى كده ان المعارضين نازلين تحت امن و امان الشرطة. و برده مش معنى ان أوباما يجى يقول انا بنحاز لثورة 25 يناير اننا كنا نقول أوبــــا كده مبارك كويس.. 

الداخلية بلطجية و معظم الثوار عارفين كده.. لكن مش معنى انهم انحازوا لرأى عشان اغراض ليهم اننا نبعد عن اللى احنا شايفينه صح.

اللى متمسكين بالشرعية و رئيس الجمهورية و بيذلونا برده بيها..

معظمهم ان لم يكون 90% منهم كانوا حالفين لو شفيق اللى كسب انهم هينزلوا

و يا قاتل يا مقتول الراجل ده يمشى ((انا كنت واحدة من اللى قالوا كده على فكرة)) 

 ولا هى شرعية اختيرات.

اللى انتخبوا شفيق برده بيذلونا ان هو ده اللى انتوا انتخبتوه و قال يعنى ياما نصحناكم،

و ناسين انهم انتخبوا قاتل مشترك فى قتل اخوتنا (و لو لأ ملوش ذنب.. يبقى مرسى كمان ملوش ذنب).

المؤيدين بيشتموا فى الجيش و مش عايزين الجيش يمسك، و بيذلونا بأن الجيش انحاز للمعارضين. طب و مـ انا كمان ((يسقط يسقط حكم العسكر)) و هفضل اقولها عالطول، لكن ثوانى بس معلش..

هو الاخوان كانوا فين لما ست البنات اتهانت فى الشارع و محدش من الدقنة (اسفة فى التعبير) اتحرك من مكانوا. ايه مش فاكرين؟ الجيش مكنش وحش ليه و هو بيتقال فى اشعار و بيتحطلوا نياشين و بيشتغل مستشار للرئيس؟!

"يا مشير يا مشير من النهاردة انت الأمير" ده كان هتاف الاسلاميين في التحرير في جمعة 18/11/2011

اللى بيذلوا المؤيدين اين كان اخوان ولا سلفين ولا راجل ملوش دعوة بحاجة غير انه من وجهة نظرة انه عايز مرسى.. انت مفرقتش اى حاجة على اللى بيذلوك بحجات تانية و انت لا ثورجى ولا نيلة.

 فى ناس من اللى بتذلهم دول وقفوا جنبك و دافعوا عنك بحياتهم ودافعت عنهم بحياتك، فى منهم شهداء كتير.. اه قيادتهم زبالة، معلش هو مفيش قيادة مش زبالة دلوقتى..

هما ماشين وراهم.. مسلم او مسيحى واجبك لو انت يعنى على يقين انك على حق، اديانكم بتعلمكم تدعلهم بالهداية للطريق الصح مش الذل و الشماته..

و العكس برده يا اسلاميــن يا اتباع السلف الصالح.

كل واحد بتذله افتكر انه ممكن يكون؛

 كان بيتظاهر عشانك ضد ظباط الأمن و انت لسه خايف.

كان فى الشارع بيهتف ضد الظلم قبلك بكتير.

كان تحت الأرض و مطحون قبل مـ أنت تعرف ان فى حاجة اسمها معتقلات تحت الأرض اصلا ً.

كان عاكف فى المسجد أو الكنيسة يدعو الله أنه يناجينا من الفساد و ينور طريقك.

القيادات كلها ليس منها الحسن.. كلهم أوساخ يبيعونا بشلن و احنا اللى بنخسر فى الآخر.

و أخيرا ً 

 

اللهم أرنا الحق حقا و ارزقنا اتباعه، و أرنا الباطل باطلا و ارزقنا اجتنابه.. اللهم دبر لنا أمرنا فإنا لا نحسن التدبير..

لا تشتم حركة كفايه....فحين كنت تستمع الي أغنية اخترناك كانوا في الشارع ينادون كفايه لأول مره في تاريخ مصر
لا تشتم الأخوان ......فعندما كنت تذهب للامتحان في التاكسي كانوا يأتون للجنه في سيارة الترحيلات
لاتشتم 6 أبريل ....فعندما كنت تخاف أن تمر أمام أمن الدوله كانوا يتظاهرون هناك ويشتمون ظباط الأمن بلا خوف
لا تشتم السلفيين ....فعندما كنت تدخن الشيشه علي القهوة كانوا عاكفين في المساجد يدعون الله أن يصلح أحوالك وأحوال البلد
أمال لما أحب اشتم حد أشتم مين ؟
عندك مبارك والعادلى والفلول وعكاشه وسبايدر

- See more at: http://tahyeeeees.blogspot.com/2012/01/blog-post_29.html#sthash.aRME1R21.dpuf

اللهُم أضرِب الظالمين بالظالمين وأخرِجنا مِن بَينهُم سالمين..

تفكروا يرحمكم الله